Monday, August 23, 2010

ത്രീ ചാര്‍ സൗ ബീസ് (3 CHAR SAU BEES)

അനിയാ.... ഒന്ന് കണ്ണ് തുറക്കെടാ

ഏ... എവിടെയാ ഞാന്‍ ?

നീയിപ്പോള്‍ സര്‍ക്കാര്‍ ആശുപത്രിയിലെ എമര്‍ജന്‍സി വാര്‍ഡില്‍ ആണ് . റോഡില്‍ ബോധം ഇല്ലാതെ കിടന്ന നിന്നെ നാട്ടുകാര്‍ ആരോ ആണ് ഇവിടെ എത്തിച്ചത് . നേരത്തെ തുടങ്ങിയോടെ ഓണാഘോഷം ? എന്തോന്ന് അടിച്ചു കേറ്റിയത്?

അടിച്ചു കേറ്റുന്നു. അതിനെവിടെ സമയം ? ഒരു നിരൂപകന്‍ അനുഭവിക്കുന്ന ബുദ്ധി മുട്ടുകളെ പറ്റി തത്ത്വം പറഞ്ഞു നടക്കുന്ന ഇയാള്‍ക്ക് എന്തോന്നറിയാം ?

ഓഹോ അപ്പോള്‍ നീ പടം കണ്ടാണ്‌ ഈ പരുവത്തില്‍ ആയതല്ലേ? എടാ ഏതാ പറയുന്നേ നിനക്കീ പണി പറ്റിയതല്ല എന്ന് . കൊള്ളാവുന്ന ഒരു നിരൂപകനും എല്ലാ പടവും കണ്ടിട്ടാണ് ഈ കൃത്യം നിര്‍വഹിക്കുന്നതെന്ന് ഞാന്‍ വിശ്വസിക്കുന്നില്ല.(അങ്ങനെ ആരെങ്കിലും ഉണ്ടെങ്കില്‍ ദയവായി ക്ഷമിക്കുക)പിന്നെ , സത്യത്തില്‍ എനിക്കീ ബിവറേജസ് കടയുടെ മുന്നില്‍ ക്യു നില്‍ക്കുന്നവരെ കാണുമ്പോലെ ചിരിവരും.മണ്ടന്മാര്‍.ഒരൊറ്റ മലയാള പടം കണ്ടാല്‍ പോരെ രണ്ടു ദിവസത്തേക്ക് കെട്ടു വിടത്തില്ല.വിലയോ തുച്ചം ഗുണമോ മെച്ചം എന്ന ലൈന്‍.അതിരിക്കട്ടെ നീ ഏതു പടം ആണ് കണ്ടത്? ആനമയക്കി, കാലാപാനി , മണവാട്ടി എന്നൊക്കെ പറയുന്നത് പോലെ കുറെ ഇനം ഉണ്ടല്ലോ വീര്യം കൂടിയതും കുറഞ്ഞതും ആയിട്ടു ഓണം റീലീസ്.

ത്രീ ചാര്‍ സൗ ബീസ് എന്ന മഹത്തായ കലാരൂപം ആണ് എന്നെ ഈ പരുവത്തില്‍ ആക്കിയത് അണ്ണാ.പടം കണ്ടു ഇറങ്ങി വന്നതേ ഓര്‍മയുള്ളൂ.പിന്നെ കണ്ണ് തുറക്കുമ്പോള്‍ ഇവിടെയാ.

ഇതു ഏതു പടം ? പേര് കേട്ടപ്പോള്‍ ഏതോ ഹിന്ദി പടം ആണെന്നല്ലേ വിചാരിച്ചത് ?

ഞാനും അങ്ങനെ ആണ് വിചാരിച്ചത് . അത് കൊണ്ട് മലയാളത്തിലെ പ്രതിഭ ശ്രീനിവാസന്റെ ആത്മഗദ കാണാനായി പോകുന്ന വസിക്കാന് ഒരു സാമദ്രോഹി ഇതു മലയാളം പടമാണെന്ന് പറഞ്ഞു വിളിച്ചു കേറ്റിയത് . ആ നാറി ഒരു കാലത്തും ഗുണം പിടിക്കുകേല #$%%^^&&*

അടങ്ങേടെ നീ കാര്യം പറ.

അടൂര്‍ ഗോപാലകൃഷ്ണന് ശേഷം ആരു എന്ന ചോദ്യത്തിന് മലയാളത്തിന്റെ ഉത്തരമായ അടൂര്‍ ഗോവിന്ദന്‍ കുട്ടി സംവിധാനം ചെയുകയും ഒപ്പം നായകനായി അഭിനയിക്കുകയും ചെയുന ചിത്രം ആണ് ഇതു.ഇതൊന്നും പോരാത്തതിനു കഥ,തിരകഥ, സംഭാഷണം ഇവയും അദേഹം നേരിട്ടാണ് നിര്‍വഹിച്ചിരിക്കുന്നത്.ഒരു അഞ്ചു മിനിട്ട് താമസിച്ചു അകത്തു കേറിയത്‌ കൊണ്ട് ക്യാമറയും അദേഹം തന്നെയാണോ എന്ന് അറിയില്ല . ഭാഗ്യത്തിന് സംഗീത സംവിധാനവും (ജാസ്സി ഗിഫ്റ്റ് ) നിര്‍മാണവും (വിനോദ് നായര്‍) അദേഹം സദയം മറ്റുള്ളവര്‍ക്ക് വിട്ടു കൊടുത്തിട്ടുണ്ട്‌.ഏതായാലും ഏറ്റെടുത്ത എല്ലാ മേഖലയും ഒരു പോലെ വൃത്തികേടാക്കാന്‍ അദേഹത്തിന് വിജയപൂര്‍വം സാധിച്ചിരിക്കുന്നു എന്നാണ് എന്നിക്ക് തോന്നിയത് . ആ കാര്യത്തില്‍ അദേഹം ഏതെങ്കിലും ഒന്നിനോട് ഒരു പക്ഷാഭേദം കാണിച്ചു എന്ന് ശത്രുക്കള്‍ക്ക് പോലും പറയാന്‍ പറ്റില്ല .ചിത്രം അവസാനിക്കുന്നത്‌ എല്ലാ കുറ്റ ക്രിത്യങ്ങളുടെയും മാതാവ്‌ പണം ആണ് എന്ന് എഴുതി കാണിച്ചു കൊണ്ടാണ്. പത്തു കാശു ഉണ്ടാക്കാനായി കണ്ട വഴിയാണ് ഈ രണ്ടു മണികൂര്‍ നിങ്ങള്‍ കണ്ടു കൊണ്ടിരുന്നത് എന്ന കുറ്റ സമ്മതം ആയിരിക്കണം ഇതിലൂടെ സംവിധായകന്‍ ഉദേശിച്ചത്‌ .

എടേ നീ എങ്ങനെ കത്തി കേറാതെ കാര്യം പറ .ബാക്കി കാര്യങ്ങള്‍ എങ്ങനാ ഈ പടത്തിന്റെ.

ഈ പടത്തില്‍ എനിക്ക് ബഹുമാനം തോന്നിയത് ഇതിന്റെ നിര്‍മ്മാതവിനോടാണ്. ഒരു ബ്രമാണ്ടന്‍ സൂപ്പര്‍താര ചിത്രത്തിന്റെ നഷ്ടവും ഇങ്ങനത്തെ ഒരു പടത്തിന്റെ ചിലവും ഏതാണ്ട് ഒരു പോലെ വരും എന്നാണ് എനിക്ക് തോന്നുനത്.(നിലവാരം പിന്നെ രണ്ടിനും ഇല്ലല്ലോ) . ഒരുത്തന്റെയും മുന്നില്‍ ഒചാനിച്ചു നില്‍ക്കാതെ ചുളുവിനു നിര്‍മ്മാതാവ് ആകാം.ഞാനും ഒരു പടം പിടിച്ചല്ലോ എന്നാണ് ആലോചന അണ്ണാ ...

എടേ നീ കാടു കേറാതെ കഥ അഭിനയം ഇതിനെ പറ്റിയൊക്കെ ഒന്ന് പറഞ്ഞെ.

കഥ , എഞ്ചിനീയറിംഗ് കോളേജില്‍ പഠിക്കുന്ന മൂന്ന് വിദ്യാര്‍ഥികള്‍ സെല്‍വന്‍,രാഹുല്‍,സുല്‍ഫി. ഇവര്‍ മൂന്ന് പേരും മോഷ്ടിച്ചാണ് ജീവിക്കുന്നത്. മോഷണം എന്നൊക്കെ പറഞ്ഞാല്‍ എ ടി എം കാര്‍ഡ്‌ അടിച്ചുമാറ്റല്‍ മുതല്‍ കോളേജിലെ സേഫ് ബോംബ്‌ വെച്ച് മതില്‍ പൊളിച്ചു അടിച്ചു മാറ്റുന്നു വരെയുണ്ട് ഇവര്‍.എന്നാല്‍ ഏതൊക്കെ ചിത്രീകരിച്ചിരിക്കുനത് സീരിയല്‍ നിലവാരം പോലും ഇല്ലാതെയാണ് എപ്പോളും പുതുമ ഉള്ള മേഖല തേടുന്ന ഇവര്‍ പണക്കാരനായ ചന്ദ്രന്‍ മുതലാളി യുടെ (സലിം കുമാര്‍) വീട് നോട്ടമിടുന്നു .മോഷ്ടിക്കാന്‍ വീട്ടില്‍ കേറുന്ന ഇവര്‍ കൊല്ലപ്പെട്ടു കിടക്കുന്ന ചന്ദ്രന്‍ മുതലാളിയെ ആണ് കാണുന്നത് .പിന്നെ പോലിസ്നെ പേടിച്ചുള്ള ഓട്ടവും കുറ്റവാളി ആരാണെന്നു കണ്ടു പിടിത്തവും പിന്നെ ഒരു തകര്‍പ്പന്‍ (കണ്ണ് നിറഞ്ഞു പോകുന്ന) ക്ലൈമാക്സ്‌ കൂടിയാകുമ്പോള്‍ ഈ ചലച്ചിത്ര കാവ്യം അവസാനിക്കുന്നു.ക്ലൈമാക്സ്‌ എന്നോട് ചോദിക്കല്ലേ പ്ലീസ്. എന്നെ കൊന്നാല്‍ ഞാന്‍ പറയില്ല .അത്രക്ക് കരള്‍ അലിയിപ്പികുനതാണ് സംഭവം.

പിന്നെ അഭിനയം . മുകളില്‍ പറഞ്ഞ മൂന്ന് പേര്‍ കൂടാതെ നായിക വേണമല്ലോ എന്ന് കരുതി അനു (എന്നാണെന്ന് തോന്നുന്നു ) എന്നൊരു പെങ്കൊച്ചിനെ കാസ്റ്റ്‌ ചെയ്തിട്ടു ഉണ്ട്. അത് പോലെ പോസ്റ്റര്‍ ഇല്‍ തല കാണിക്കാന്‍ മാത്രമായി ജഗതി , സിറാജ് ,സലിം കുമാര്‍,കലാഭവന്‍ മണി,സുകുമാരി ഇങ്ങനെ കുറച്ചു പേര്‍ . സിറാജും സലിം കുമാറും ഈ ചിത്രത്തില്‍ വളരെ നന്നായി അഭിനയിചിടുണ്ട് .പ്രേക്ഷകര്‍ എത്രയും സന്തോഷത്തോടെ കണ്ടിരിക്കുന്ന അവരുടെ മറ്റു ചിത്രങ്ങള്‍ കാണില്ല . അതിനു കാരണം ഈ ചിത്രത്തില്‍ അഭിനയിക്കുന്ന അറ്റ്ലസ് രാമചന്ദ്രന്‍ നടത്തുന്ന മികച്ച അഭിനയമാണ് .ഈ മനുഷ്യന്‍ എന്തിനാണ് ഇങ്ങനെ മലയാള പ്രേക്ഷകരോട് ക്രൂരത കാണിക്കുന്നതെന്ന് എത്ര ആലോചിച്ചിട്ടും എനിക്ക് മനസിലാകുന്നില്ല .ഇതില്‍ പക്ഷെ ഇവരെ ഒക്കെ കടത്തി വെട്ടിയിരിക്കുനത് വില്ലനും അദേഹത്തിന്റെ സഹായിയും ആണ്. ആദ്യം വില്ലനെ പറ്റി . അദേഹം ആയിരം കോടിയുടെ ആസ്തി ഉള്ള ഒരു ബിസ്നെസ്സ് രാജാവാണ് . ഈ സ്വത്തു അദേഹം സമ്പാദിച്ചത് ഇങ്ങനെ എന്നിടത്താണ് തമാശ . ആദ്യമായി അദേഹം ഒരു മണ്ടന്‍ മുതലാളിയെ കണ്ടു പിടിക്കുന്നു.(മണ്ടന്‍ ആണ് എന്ന് ഗേറ്റ് ഇല്‍ എഴുതി വയ്ക്കുന്ന മുതലാളി ആണെങ്കില്‍ പണി എളുപ്പമായി ). മണ്ടന്മാരായ മക്കള്‍ ഉള്ള മുതലാളി മാര്‍ക്ക് മുന്‍ഗണന ലഭിക്കുന്നതാണ്. അവരുമായി partnership ബിസ്നെസ്സ് തുടങ്ങുന്ന ഇദേഹം കുറച്ചു കഴിഞ്ഞു പങ്കാളിയായ മണ്ടന്‍ മുതലാളിയെ നേരിട്ട് പോയി കൊലപ്പെടുത്തി സ്വത്തു മുഴുവന്‍ അടിച്ചു മാറ്റുന്നു.(മക്കള്‍ മണ്ടന്മാര്‍ ആയതിനാല്‍ നോ പ്രോബ്ലം) വീണ്ടും അടുത്ത മണ്ടന്‍ മുതലാളിയെ തേടി പോകുന്നു.എങ്ങനെ ഉണ്ട് പരിപാടി?ഇയാളുടെ സഹായി ഒരുത്തന്‍ ഉണ്ട്. അദേഹം തല്ലു കൊണ്ട് അവശനായി കുറ്റ സമ്മതം നടത്തുന്നത് പോലും നാടകീയം ആയും അട്ടഹസിച്ചും ഒക്കെയാണ്.(അദേഹം വില്ലന്റെ HR മാനേജര്‍ ആണത്രേ !!!)ഒരു പോലിസ് ഉദ്യോഗസ്ഥനെ ആദ്യം വലിയ കൊലഹലതോടെ കാണിക്കുനത്,പകുതി കഴിഞ്ഞപ്പോള്‍ ആളു പിണങ്ങി പോയിട്ടാനെന്നു തോന്നുന്നു പിന്നെ കാണാന്‍ ഇല്ല.കോളേജ്ല്‍ വെച്ച് നടത്തുന്ന ഒരു ഡാന്‍സ് (എന്ന് ഗോവിന്ദന്‍ കുട്ടി ഉദേശിച്ച സാധനം) കാണുമ്പോള്‍ കൊറിയോഗ്രാഫിയും അടൂര്‍ തന്നെയാണോ നിര്‍വഹിച്ചത് എന്ന് സംശയിക്കേണ്ടി ഇരിക്കുന്നു.തമിഴ് ഗ്രാമത്തില്‍ ജനിച്ചു വളര്‍ന്ന സെല്‍വനും കുടുംബവും മിക്കപോളും ശുദ്ധ മലയാളത്തില്‍ (വള്ളുവനാടന്‍ സ്ലാങ്ങില്‍)അന്ന് വെച്ച് കാച്ചുന്നത്

മതി അനിയാ തൃപ്തിയായി . ഇനി ചുരുക്കത്തില്‍ ഒരു വാചകം കൂടി .

ഓണത്തിന് വേറെ ഒരു ജോലിയും ഇല്ലെങ്കില്‍ പോയി മദ്യപിക്കുക .(അതാണല്ലോ മലയാളികളുടെ ദേശീയ വിനോദം ) വഴിയിലോ വീടിലോ കിടന്നുറങ്ങുക . അല്ലാതെ എന്നെ പോലെ ഇങ്ങനെ ...................

1 comment:

  1. ആരാ ഈ സിറാജ്???? സുരാജിനെ ആണോ ഉദ്ദേശിച്ചേ?? കൊച്ചുണ്ണി ആശാന്‍ എന്നൊരു പാട്ടുണ്ട്. അതെനിക്ക് ഇഷ്ടപ്പെട്ടു.... സിനിമ ഞാന്‍ കണ്ടില്ല

    ReplyDelete